„Tschüss, Kasper!“

De Mama is met Bennätzken in der Kiärke wiäst un hiät iähme dao vertallt, wat füör schoine Hillige dao op me Altaore wäören.

„Dat is Poitrus un dat is Paulus. Dat is de heilige Nikolaus, dao segget se op Platt Klogges füör.
Un dao ächen dat is de heilige Antonius, dat is de Fickeltünnes!“

Ä dai beiden niu riut gängen iut der Kiärke, dao siet Bennätzken:
„Tschüs, Poitrus! Tschüs, Paulus! Tschüs, Klogges! Tschüs, Fickeltünnes!“

De Här Pastäoer dai sittet dao grade imme Bichtstauhl un frögget sick üöwer diän kleinen Paost, dat dai säo guet Beschoid woit met diän Hilligen.
Un dao dait de Pastäoer de Garduine vamme Bichtstauhl op de Suite un kuiket dao ächter denne: „Das ist aber schön, dass der kleine Junge die Heiligen schon alle so gut kennt!“

Dao siet Bennätzken: „Tschüs, Kasper!“

aus dem Buch: „Spaß auf dem Nachtkonsölchen“